Presidenti i Serbisë Aleksandër Vuçiç e ka konsideruar si të vështirë takimin e sotëm tre-palësh në Bruksel. Përmes një reagimi në rrjete sociale, Vuçiç shprehet se nuk ka dorëzim dhe thekson se ishte e pritshme që ky takim të mos ishte i lehtë.
“Një takim i vështirë. E pritshme. Nuk ka dorëzim”, shkruan ai.
Në fokus të këtij takimi ishte propozimi i planit europian të BE për dialogun Kosovë-Serbi. Në një reagim në Tëitter, shefi i politikës së jashtme të Bashkimit Evropian, Josep Borrell, u shpreh se pret qasje konstruktive nga dy palët.
“Kam mirëpritur në Bruksel kryeministrin Albin Kurti, dhe presidentin Aleksandar Vuçiç, në takimin e nivelit të lartë të dialogut Prishtinë-Beograd. Në agjendë: propozimi i BE-së për normalizimin e marrëdhënieve. Shpresoj që të dyja palët të kenë një qasje konstruktive”, shkroi ai në Tëitter.
Takimi i gjashtë në radhë mes dy palëve erdhi pas tensioneve të shtuara në veri të Kosovës. Takimi u ndërmjetuësua nga shefi i politikës së jashtme të Bashkimit Evropian, Josep Borrell, dhe të dërguarit të BE-së për dialogun Kosovë-Serbi, Mirosllav Lajçak.